Mayele pe tina ya kosolola

Kosolola ekoki kozala kati na bato mibale to bato ebele.

Ezali na kosolola oyo moto na moto akobimisa makanisi oyo ya ye.
Makanisi ya songolo ekoki koboyana na makanisi ya pakala.
Na boye Songolo akoluka bindimiseli oyo ekomonisa ete makanisi oyo ya ye, ezali kolanda molongo ya makambo.
Akoluka pe kolakisa boni boni makanisi ya pakala ezali kolanda molongo ya makambo te.
Pakala pe akosala lolenge moko po na komonisa ete ya ye makanisi nde ezali na nzela, nzoka nde makanisi ya songolo ebimi libanda.
Mbuta Thomas Muan’Ambuta, ateyaki ngai boye, uta bokoko na biso, po na kosolola malamu, esengaka soki songolo azali koloba, Pakala afanda kimia.
Ayokamela bozindo ya maloba ya songolo.
Tango songolo akosilisa, liboso ‘te Pakala ayanola, akobanda liboso koloba na bokuse makambo oyo Songolo alobi.
Pe akotuna ye soki ezali bongo. songolo akondima te : « iyo. Olandi ngai malamu ».
Na sima na yango Pakala akoyanola.
Moto na moto tango akozwa maloba, akolanda esololeli wana.
Koboya makanisi ya moto ekeseni na kofinga moto to koloba makambo oyo ekotuta lokumu ya moto bo moto na kati ya bato.
Soko molobani na yo alobi makanisi na yawuli, okomonisa boyawuli ya makambo ye alobi kasi okoloba te ete azali yawuli.
Ekomelaka moto nyonso na mokili aloba yawuli to asala bozoba.
Ekomelaka pe moto nyonso aloba makambo ya bwanya pe asala makambo ya mayele.
Lisolo po etambola malamu esengaka komemyana.
Bolobani ekoki komema balobani na boyokani.
Bokaboli makanisi ememi pole.
Botawu (faiblesse) ya likanisi na likanisi elongwe, pe, bokasi ya likanisi moko moko esangisami.
Na suka ya lisolo, babimi na likanisi moko elenda.
Bolobani ekoki pe komema balobani na boboyani makanisi.
Moto na moto akotikala na oyo ya ye likanisi.
Kasi ezala bayokani to bayokani te, bamemyani.
Ezali te po boyokani te, nde bofingana.
Ezali pe te po ofingi moninga nde likanisi na yo endimami.
Tolobanaka na limemya. Ekolisaka boyebi.
Foto : Bayaya ya kelasi ya motoba na Institut Nsene Etienne. Bawuti momekano ya leta.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *