Yo moko oyebi français te, ozoseka ye po na nini ?

Likambo ya français, tokosuka wapi?

Bavidéo pe ba-audio ebele ezali kotambola po na koseka pe kotyola bato oyo bazali koloba français ezanga nzela.

Français ezanga nzela, eponi moto te. bato ya politiki, bana bazwi na examen d’Etat, ba-alongi-na-ye , balakisi, ba-artiste (bayi-ntoki), bapanzi-sango, molongo ezali molayi.

Bato ebele basekaka pe batyolaka baninga. Kasi likambo ya kokamwa, tango nazali kotanga matyoli yango, kati na baseki pe batyoli, bango moko, bazali kosalela français ezanga nzela po na koseka moto oyo azali koloba français ezanga nzela!

Mbwa aswi mbwa!

Na minyama ya bosololi na internet, bato balingi kokoma kaka na français. Basusu kaka na anglais.

Soki otangi… français yango etengama, anglais ebukana. Kasi baboyi kokoma na lingala, baboyi kiswahili. Tshiluba na kikongo, kara ya nyama!

Boyebaka, natangaka bafrançais na bino. Naboyaka koloba po tokobebana!

Bato ya psychologie bakolimbolela biso yango malamu. Na mokuse, toza na somo ya libanda, toza bacomplexé.

Po oyeba malamu, esengi liboso ondima ete oyebi te. Po oyeba français malamu, banda nanu kondima ete : « oyebi français te ». Ndima yango na kuzu, ndima yango pe na mpwasa. Moto akoboma yo azali te.

Mituna, est-ce que il faut kaka toyeba français?

Bato mingi bakoloba na yo oui, ezali langue officielle na biso.

Natuni sikoyo : soki tolongoli yango langue officielle, tokokufa ? Tozangi minoko? Tozali na Lingala, Kiswahili, Tshiluba, Kikongo. Soki totié minoko wana minei lokola balangue officielle, tokokufa ? Te.

Po na nini konyokola nzoto, eyemba Lutumba, esika na yo ezali awa!

Bolamu nini tokozwa, soki na kelasi, na politiki, na internet, na TV, tokomi kosalela kaka minoko na biso?

Tokoyeba nini tozali koloba.
Tokoloba nini tolingi koloba.
Tokoyoka nini bazali koloba.
Tokobima bilema te.
Zoba akozala zoba, moto ya mayele akozala moto ya mayele.

Mama wana ya Maniema, soki alobaka na kiswahili, tolingaki toyeba soki azali na emoneli oyo esengeli po na kotambusa mokumba oyo bapesaki ye. Awa, moto nyonso amoni ye zoba po ayebi koloba français te.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *