Posa ya kibokonzi ekomema wapi?

Posa ya kibokonzi ekoki kotinda yo obanda koswana to kofinga-finga bato oyo bozalaki koyokana na bango lobi.

Obosani ete, eloko ya motuya ezali ndenge nini kosala po, kotambusa mboka ekoma malamu koleka ndenge mboka etambusamaki lobi.

Uta 1885 kino Lelo, mboka ezali kokonzama kaka na bapaya.

Mwana mboka oyo alingaki kokamba ezalaki kosenga na ye kondima bikila oyo bapomba ya mokili bazalaki kopesa ye. Oyo aboyaki, alekanaki mbeka.

Oyo andimaki, esengelaki na ye, azala lokoso te po, mwa ndambo oyo bazalaki kotikela ye, akabola yango na bayi-Kongo nyonso.

Kasi, ezala Mobutu, ezala Joseph Kabila pe bato basalaki na bango, basepelaki kotondisa mabumu na bango moko.

Lelo oyo, ezala Félix Tshilombo Tshisekedi, ezala Martin Fayulu, oyo akokoma mokonzi, akozala maboko ya kokanga. Ekosenga na ye, na mwa ndambo oyo bakotikela ye, ayeba kosalela yango po ete bayi-mboka bazala malamu.

Sikoyo, tokotikala kaka bongo, kozelaka bapaya babwakelaka biso mwa lomeya po tobikaka lokola semba-bilokota? Te. Etali kaka biso, soki tolingi tozala lisusu lembele lokola Lelo te.

Ekosenga, tango tokozwa bakonzi oyo baboyi lokoso, bakoka kopesa makoki ya solo na biteyelo. Totangisa bato po bakoma bakeli-misala. Mokonzi azángá lokoso, akotelemisa mapinga ya solo.

Soki tokomi na bato ya mbongo oyo bazwaka mbongo na mosala pe mombongo, wana tokokoma na makoki ya kowelana bomengo ya Kongo na bato ya libanda.

Lelo, tozonga bato. Totika koswana-swana, totika bilobela.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *