Parti politique na RDC, ezalaka ndenge nini !

RDC : Parti politique to Lingomba ya politiki?

Po na ngai, «lingomba ya politiki», ekeseni na «parti politique». Nalobi te ete, «parti politique» eleki «lingomba ya politiki» na malamu to na mabe. Te. Ekeseni nde.

Nabeleli ete : Na Ekolo Kongo ya Demokrasi, «parti politique» ezalaka te. Tozalaka nde na «mangomba ya politiki». Na boye, ekozala malamu, toyangela yango bo mangomba ya politiki, na esika toloba ete tozali koyangela ba«parti politique».

Po na nini nalobi boye? Bokeseni ezali wapi kati na «lingomba ya politiki» pe «parti politique»?

«Parti politique» ezali lisanga ya bato oyo, makanisi ya ndenge moko nde, etié bango esika moko po na koyangela mboka. Bazali koluka ndenge ya kofandisa pe kondimisa makanisi yango na Ekolo mobimba. Lisanga yango ekoluka ndenge ya kozwa bokonzi po bakokisa oyo bakanala kosala.

Bakoki kozwa bokonzi na nzela ya maponomi (babengi yango demokrasi). Bakoki kozwa bokonzi ezanga maponomi (kokonza na makasi).
Ezala na ndenge ya demokrasi, ezala na ndenge ya makasi, bakoluka nzela ya kokokisa oyo makanisi na bango.

Soki bazali nanu na bokonzi te, bakotelemela baye bazali na bokonzi. Bakobanda kolandela misala po bapusa bakonzi na kosala ndenge bango, batelemeli, bamoni ete ezali malamu.

Elekaka ndenge nini na RDC?

Tango ya kobunda po na kozwa bonsomi, mangomba ya ndenge mibale, ekelamaki. Ya liboso ezalaki mangomba ya bato balobaka monoko ya mboka moko. ABAKO esangisaki Bakongo. ABAZI esangisaki Bayanzi. Ya mibale, tozalaki na mangomba oyo esangisaki bato ya bikolo ebele. Ndakisa, lingomba MNC ekambamaki na Lumumba. Na sima ya mikolo, Lumumba na Kalonji babebanaki. Kalonji akelaki MNC-Kalonji. Eteni ya Lumumba ekomaki MNC-Lumumba.

Uta na tango wana, kino lelo oyo, tozali na ndenge mibale ya mangomba ya politiki. Mangomba oyo esangisaka bato ya monoko ya mboka moko, pe, mangomba oyo ezalaka na sima ya Songolo to Pakala.

Mobutu tango azwaki bokonzi na makasi, abomaki mangomba nyonso ya politiki. Na sima ya mvula moko, ayaki kokela lingomba na kombo CVR. Na sima ya mvula moko, CVR ebongwamaki MPR. Uta wana, ayangelaki Congo na nzela ya MPR. Na lingomba yango, moto nyonso azalaki koyokela Mobutu.

Komvuka elekaki ndelo. Na boye, ngulupa ya bato mosusu oyo babandaki na ye MPR, babimaki pe basalaki lingomba na bango. Sima ya mwa bamvula, lingomba yango ebengamaki na kombo ya UDPS. UDPS esangisaki bato ndenge na ndenge. Malembe-malembe bato yango bakomaki kolongwa. Misusu bazonganaki na Mobutu, misusu bakelaki pe mangomba na bango moko, misusu pe batikalaki bango moko na ndaku. Ya kokufa pe bakufaki. Mvula sima ya mvula, Tshisekedi atikalaki ye moko mokonzi na kati ya UDPS. Bokosala oyo ye akoloba. Soki oboyi : to olongwe, to, alongoli yo. UDPS etikalaki ya Tshisekedi kino tango akufi awa na 2017.

AFDL tango bazwaki mandoki po na kobengana Mobutu na bokonzi, moto asangisaki bango ezalaki nde Kagame, mokonzi ya Rwanda pe mokonzi ya lingomba FPR oyo azwaki bokonzi na Rwanda. Tango bakomaki na Kinshasa, yambo ete Kagame atia mokonzi oyo ye alingaki kotia, Kabila Laurent oyo azalaki molobeli ya lingomba yango, amisakolaki bo Tata-Mokonzi. Na boye, akomaki mokonzi pe akonzaki mokili na ye na ndenge na ye. AFDL ekomaki ya ye. Tango babomi ye pe Kabila Joseph akomi mokonzi, ye pe akelaki PPRD. Likambo ya sika ebimi, mokonzi ya lingomba bakomi kobenga ye «autorité morale».

Mangomba ekobaki na kokelama. Lelo ezali 450. Lingomba na lingomba, na «autorité morale » na yango. Yango nyonso, etambusamaka na ndelo ya lopango ndenge tolimboli awa.

Lingomba moko te elobaka polele ete : ezali lingomba balandaka moto songolo, to, bazali ya monoko ya mboka pakala, kasi, mangomba nyonso ya politiki na Congo efandisami na bosolo oyo mibale. Tango mosusu okomona pe ete esangisi nyonso mibale, balandaka moto songolo pe bazali bato ya monoko ya mboka pakala.

Motuna : ndenge nini kotambusa mangomba ya politiki po na bato ya politiki bayangela Ekolo Kongi, na ndenge esengeli?

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *