Na Congo, batangisaka français mabé

Bana na biso, français ezali munoko na bango te. Nalingi koloba : na bomoyi na bango ya mokolo na mokolo, basalelaka français te.

Soki olingi kolakisa ye français, esengeli …

Lire en français

kosalela etangiseli oyo esengeli na moto oyo Français ezali monoko na ye te. Okobeta sete liboso na makambo oyo : koyoka, koloba, kotanga, kososola malobami. Na sima nde okoya kodindisa ye na mibeko ya monoko.

Bo momeseno, etangiseli na Congo ezalaka boye : na kelasi ya mibale ya ebandeli (2ème primaire), babandi koluka mwana ayeba kokoma malamu. Moyekoli akolekisa bangonga ebele, na koluka koyeba, ndenge ya kokoma balolaka (sons) oyo ya mbilingambilinga. Na kelasi ya misato (3ème primaire), esi bakotisi ye na mibeko ya français (grammaire française).

Mateya nyonso, ezala ya français, ezali kopesama kaka na français. Molakisi akoloba pene na ngonga mitano (5 heures) na lopoto. Wana moyekoli azoyeba lisusu kolanda te. Obwakisi ye.

Ezali te po, bayekoli bazali kolanda mateya na français, yango nde, ekobongisa koyeba français na bango. Ezali pe te, po, moyekoli akofanda tango molai na koyoka molakisi, kolobela ye makambo oyo ye nanu ayoka te, na monoko oyo ye ayebi te, nde moyekoli akokomisa boyebi yango ekoma ya ye, to pe, akoyeba monoko yango.

Etangiseli oyo esalelamaka kino na moi ya lelo na biteyelo ya Congo esili komonisa suka na yango. Ndelo ya bana oyo bazali kokata kelasi (kobuka biki) ezali moko ya makasi koleka na mokili. Ezali te, kaka po na kozanga makoki. Ezali pe po na monoko ya kotangisela.

Bato moke bayebaka penza français na ndenge elongobani. Nzoka nde, français nde monoko batangiselaka bango.

Ndelo pe ya kosimba boyebi ezali lisusu moke koleka. Okoki komona, mwana asilisi kelasi, kasi ayebi kokoma te, ayebi koloba te, makambo pe ya kelasi yango, ayebi yango te.

Esengeli tobongola etangiseli.

 

Une réflexion au sujet de « Na Congo, batangisaka français mabé »

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *