Mateya ya Bobongoli. Litéya 1. Nkotela

Tomonaka, soki okei na bingumba minene ya Afrika, to pe, na bamboka ya kati, ndakisa na zando, okoyoka bato bakosolola na minoko mibale, misato to pe mata. Ndakisa na zando ya Dipeemba na Mbuji-Mayi, okoyoka mbala mosusu mosombi azali koloba Lingala, moteki azali koloba Tshiluba. Bakomi koluka ndenge ya koyokana, moto mosusu azalaki koleka, ye ayebi Thshiluba pe Lingala, akomi kolimbolela bango makambo yango. Kobongola maloba na minoko ebanda uta kala, kobanda na tango ya bakoko na biso. Ata kala kala, na tango ya bakoko na biso bato mwindu bazalaki na Kemet (Egypte), lelo bamvula koleka 5400, minoko ezalaki kolobama ebele.

Na boye, na lopango ya Faraon, ezalaki kosenga babongoli maloba (batraducteur) babongolaka na minoko nyonso po na kopesa nzela na bato ya bikolo oyo etongaki Kemet po na koyokana.


Lelo oyo, mokili ekomi lokola mwa mboka moke, basango ezali kotambola na lombango penza na nzela ya internet. Ata ko ekomi lokola mwa mboka moke, minoko koleka nkoto mitano (5000) nde elobamaka na mokili.

 

Na boye, ekosenga tango nyonso komatisa mayele ya kobongola maloba, kolongwa na monoko songolo kokende na monoko pakala.
Kobongola maloba na moyi ya lelo ekomi mingi mingi kosenga kozwa ndakisa maloba oyo ezali na Anglais, to pe, na Français, kotia yango na Lingala po na kopesa nzela na bato ya Mangala, bayeba nini ezali kolobama.

 

Na bizonga, ekosenga pe kozwa maloba oyo epesami na Lingala, kotia yango na Français to na Anglais po bato oyo bayebi minoko wana bayeba nini ezali kolobama epayi ya bato ya Mangala. Oyo ebandi kosalama mingi na mikolo oyo ezali nde mabongoli oyo.

 

Na mikolo ezali koya, kobongola kolongwa na monoko songolo ya Congo pe kotia na monoko pakala ya Congo ekokoma pe mingi. Ekokoma kosenga kobongola maloba kolongwa na Lingala kokende na Kiswahili, kolongwa na Tshiluba kokende na Kikongo, kolongwa na Lingala koya na Tshilmuba pe bongo na bongo.

 

Na boye, moyekoli ya mosala ya kobongola, esengeli na ye kokembisa mosala na ye ya Mobongoli (Traducteur (trice) / Interprète). Na mikabo ekolanda tokomeka koluka bamayele na oyo etali kobongola maloba kolongwa na Français pe kokende na Lingala.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *