Lelo nakanisi yo lisusu

Leló nakanisí yó lisusu

Mayí etangí na míso

Olobákí okosunga bísó sima

Leló toyéí kosunga yó

Leló, koyóka sóni té,

Mokilí esálámá se bóngó

Lóbí pe ezalí mokolo

Leló yó na pási

Baóyo baliáká,
Basepeláká
Na bozwí na yó
Leló bapésí yó mokongo

Kolela tee,
Mokilí yangó,
Esálama se bóngó,
Moto azalí se moto,

Sálá bolámu pó na bolámu
Kosála malámu na elikyá
Lóbí bakozóngisela yó bolámu,
Ezalí kokóna na ebale!

Mabé tokosálaka
Efútamaka tee
Bolámu pe
Efútamaka tee

Ezalí pe likelemba té,
Pó leló yó olié,
Lóbí ngáí nakolia!
Te, lelo olié, lob olié lisusu

Bato ya mabé óyo
Bakúfá ezángá
Bafúta mabe
Batondá bebo na malita!

Bato ya malámu óyo
Pé, basúká na pásí,
Batóndá bebo na malita!
Olela yó na nání?

Nzambe, mokilí na yé,
Asálá yangó yé mókó,
Ezángá likopa
Asenga lisungi te!

Sálá malámu na yó
Pó motéma na yó
Eséngí yó kosála malámu!
Sé bóngó ndeko molingamí!

Lilobo ya Mabiki Ida, mama abota Bié!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *