Kotraduire to Kobongola esalamaka ndenge nini ?

Libongoli ezali maloba oyo elobamaki to ekomamaki na monoko songolo, batie yango na monoko pakala. 

Kasi esengeli koyeba ete, monoko na monoko ezali na emoneli na yango ya makambo. Etindaka pe ezala na ndenge na yango ya kolobama.

Yango wana, kobongola elakisi te, kobongola liloba na liloba kolongwa na monoko songolo pe kokende na monoko pakala. Kobongola etalaka liboso ete likanisi ndenge ezalaki pe esosolamaki na monoko songolo, ebatela likanisi pe lisosoli yango na monoko pakala.

Ndakisa na lingala balobaka :

Bayá mbángu baleká. Ya bisó sé malémbe.

Ezali toli po na koloba ete: ezali na litomba te ya kowelela likambo, sala yango na tango na yango. Ekoki pe koloba : zela ngonga na yo, kowela-wela, okoya koleka esika esengelaki ozala pe okozanga oyo osengelaki kozwa. 

Lisese oyo na français balobaka :

Rien ne sert à courir. Il faut partir à point.

Tomoni ete, soki tolobi tobongola lisese ya lingala na français, ekokokana te, na lisese ya français. 

Lisese na lingala :

Baya mbangu, baleka. Ya biso se malembe.

Libongoli ya maloba :

Ceux qui sont venus en courant, ont depassé. Nous, c’est lentement.

Lisese na français :

Rien ne sert à courir. Il faut partir à point.

Soki pe tolobi tobongola lisese ya français na lingala, ekokokan te na lisese ya lingala.

Lisese na français:

Rien ne sert à courir. Il faut partir à point.

Libongoli ya maloba:

Kokima mbangu ezali na mosala te. Esengeli kokende na ngonga. 

Lisese na lingala:

Baya mbangu baleka. Ya biso se malembe.

Ndakisa oyo emonisi ete, soki nalingi kobongola, esengeli nabatela na molimo na ngai mobeko oyo : na monoko oyo, likanisi oyo, balobaka yango ndenge nini?

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *