Koloba : « mindele bazonga », elakisi nini?

Liboso tozwa lipanda, soki olingi kokende na Kalina (Gombe), ezalaki kosenga ozala na carte oyo ezali kopesa yo ndingisa ya kokota kuna.

Bayindo oyo bazalaki kokota kuna, ezalaki kaka bato oyo basalaka epayi ya mindele.

Bowumbu wana ezalaki na bilongi ndenge na ndenge. Yango wana batata na biso babundaki po tozwa bonsomi, tokoka komikonza.

Lelo oyo makambo ebele esali ete tozonga sima. Kasi, tomikosa te. Pasi oyo tozali na yango lelo oyo etinda biso te, toloba ete : « mindele bazonga! » Koloba bongo ezali kondima ete, tozali na molongo ya bato te.

Pasi soki eyeli yo, esengeli okoba koluka ndenge nini komibimisa, komilongolisa na kati na yango.

Goyi-goyi pe zololo ekoki kotinda biso toloba ete: mindele bazonga. Koloba bongo ezali po, na se ya motema, tozali kolikya ete, soki mindele bazongi, Kongo ekokoma lokola Poto. Lokuta. Soki bazongi, tokozonga bawumbu.

Esengeli na biso komindima ete tokoki kobongisa bomoyi na biso na mabele bakoko baponela biso pe batikela biso.

Soki tomitiki, bato mosusu baye kobongisa Kongo, bango nde bakokoma bakolo Kongo pe biso tokolimwa. Ezalaka bongo!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *