Kelasi pe mbongo

Soki olingi kokoma mozwi, ezali na kelasi te.
Kelasi ezali po na kokoma moto ya mbongo te.

Soki koluka mbongo ezali posa na yo ya liboso, soki esi oyebi kotanga pe kokoma, kosala mituya ya bakisa, longola, kabola, yikinya, ekoki. Kende na yo koluka mbongo.

Tango okomi mozwi na mosolo ebele, biso bato totangi mingi, tokoya kosunga yo po na misala na yo. Na suka, ofuti biso, tokokisi motuya ya mokolo.

Nalobi bongo po kelasi ezalaka po na kokolisa masosoli ya ndenge mokili etambolaka.

Pasi ezali lelo po, moto azali komema mwana na ye na kelasi, na elikya ete mwna na ye atanga mingi, akoma mozwi, akoma moto ya mbongo. Tango moboti akokoma mpaka, mwana na ye akobikisa ye po mwana na ye akozala moto ya mbongo.

Kelasi ekomi lokola kisi ya moyeke ! bato bazokende po batokaka mbongo. Libabe ezali lokola escroquerie. Osilisi kelasi, obandi koluka mosala, ozwi mosala, lifuta ezokoka te, kasi ozali kosilika : ndenge nini bato oyo batanga mingi te, baleka biso na mbongo?

Ebandeli ya motema mabe. Okomi kofinga babeti ya bale. Okomi kofinga bato ya mindule. Okomi kofinga bapasteur. Okomi kofinga bato ya politiki. Okomi kofinga bachinois, baIndien na baLibanais. Na Kinshasa, tokomi kutu kofinga bawewa po bazosala mwa balar, bazosomba mwa bandaku…

Nalobi te, kotanga ezali mabe. Te, kotanga ezali malamu. Kasi kotanga epesaka mbongo te. Kotanga esungaka po na koyeba pe koyeba kososola. Moto atanga pe akoki kozala mozwi. Kasi po na yango, ezosenga ye azala pe na molimo ya mozwi. Mozwi na moto ya mbongo ezali bato mibale.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *