Gouverneur na Lingala okobenga ye nani?

Gouverner ezali kotalisa nzela makambo esengeli kotambola (prévoir) pe koyangela (gérer), elingi koloba kotambusa makambo yango po oyo ekanamaki ekokisama. Na Lingala tokobenga yango «kokamba».

Likelelo oyo na français ebimisi maloba minei : gouvernant, gouverné, gouvement pe gouverneur.

Gouvernant ezali mokambi (moto oyo azali kokamba) Ekolo. Na boyike (pluriel), tokoloba gouvernants : bakambi (bato oyo bazali kokamba Ekolo).

Gouverné ezali mokambami (moto oyo bazali kokamba ye na kati ya Ekolo). Na boyike, tokoloba Gouvernés : bakambami. Bato bazali kokamba bango.

Gouverment ezala lisanga ya bato baponami to batiami na esika po na kotambusa makambo oyo ekamaki, po ete ekoka kokisama.

Na alima ya makambo, Gouverneur esengelaki ezala mokonzi ya gouvernement. Kasi na français ezali bongo te. Gouverneur ezali nani kasi?

Gouverneur ezali moto oyo azali na mokumba ya kokamba etuka (province). Ezali pe moto oyo azali na mokumba ya kokamba ebombelo misolo ya Ekolo (banque centrale). Tomoni ete ezali misala mibale oyo ekokani pe ekeseni.

Ekokani po bango mibale bakonzaka boyangeli. Bazali bakonzi-bayangeli.

Ekeseni na boye :

Na etuka, Gouverneur azali na mokumba ya kokonza pe koyangela eteni ya Ekolo. Azali tata mokonzi to mama mokonzi ya etuka yango. Akotala makambo nyonso ya bomoyi ya bato na mboka na kati ya etuka yango. Tata-Mokonzi to Mama-Mokonzi ya Etuka.

Na ebombelo misolo ya Ekolo, Gouverneur azali koyangela misolo ya Ekolo mobimba. Koyeba bomengo ya mboka ezali na ndelo nini. Kolandana na bomengo yango, akoyeba kobimisa mbongo (ezala ya makasa, ya bibende to ya elektroniki). Soki esengeli kosomba to koteka na libanda, ebombelo nde ekoyeba kolandela ebimeli pe ekoteli ya misolo. Na boye Gouverneur de la banque centrale azali Moyangeli-Mokonzi ya ebombelo misolo ya ekolo.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *