Bisika bikawuka 2 – Mokolo ya liboso – Na nzela ya mosala

Nasilisi komela kafe na ngai. Lelo mama oyo alekanaka na savoka, alekanaki nanu te. Naliaki kaka mikate na nguba. Ngai nasepelaka komela kafe na mikate na savoka. Mwa pio wana esalaka elengi na mongongo. Mwa kafe ya moto, mwa mikate ya moto, tango savoka ekoleka, oyoki mwa pimbo.

Lokola namelaka Kongo-bololo tongo nyonso po na kokima malaria, nalingaka, nameli nanu Kongo-bololo, na mbala moko nalandisi mikate na savoka. Po, soki omeli Kongo-bololo ezanga kolia, okokweya kambaki. Yango ebikisaka te. Bamelaka yango, biloko ya kolia ezali pembeni. Na nzala te.

Moyi ya lelo, ezali lokola moyi babwaki yango na lininisa. Lininisa ezali fenêtre, bozalaka lokola bapaya, monoko na yo moko, oyebi te, ya bapaya pe oyebi te.

Nazalaki koloba, moyi ya lelo, ezali lokola moyi babwaki yango na lininisa. Kongala oyo wapi ! Tozali nanu tongo kasi esi nabandi kotoka. Napusani malembe-malembe na bala-bala Shaba, nazeli bataksi-bisi oyo ekendeke Selembao. Yango ezalaka na mwa ndenge na yango.

Nakola na ngiri-ngiri to Selembao te. Nayebi te, na tango ya kala ezalaka ndenge nini ! Lelo esi esali mvula minei oyo nafutelaka na Ngiri-ngiri, mvula minei nazwaka motuka tongo nyonso po na kokita na wenze ya Selembao.

Nanu namona taksi-bisi ya malonga te. Ezalaka kaka, kitala-tala ya liboso epasuka, to ekuke ezosala malamu te, to bakiti efinana-finana, to kiti na kabini ya mokumbi esila mayi na makila, ezalaka kaka na tengu moko boye. Ekuke ezali porte. Nayebi, yekola kaka.

Nanu namona taksi-bisi ya malamu te na nzela wana ya Selembao. Kasi nasepelaka nzela wana po ezali nzela ya mokuse po na kokende na UPN, esika nasalaka.

Nakitaka na wenze ya Selembao, nabeti makolo liboso ya wenze, tii nae sika bataksi ya UPN etelemaka. Kuna nde nazwaka baketch oyo ekendaka UPN.

Mabe ya nzela wana nde mbindo. Kisasa ezali na mbindo kasi mbindo oyo ezalaka liboso ya wenze ya Selembao, te, limbisa!

Te, nalobi ya solo te. Nabuki lokuta. Kisasa ekoma na yango mbindo na mbindo.

Mokolo mosusu nakendeki Kingasani, epayi nakola. Natelemisi motuka liboso ya bala-bala oyo ewuta na Boulevard Lumumba tii na lopitalo ya bamamelo. Nakiti. Ezalaki nakutana na moto moko wana. Te, nayoka nkele penza oyo ya nkele. Etikalaki moke na sanza, likolo ya bosoto oyo esalaki ngomba na esika wana. Nazonga na motuka, nayebisa mokumbi tokende mwa mosika.

Totika, soki nabandi koloba bosoto ya Kisasa epesaka ngai na posa ya kolela.

Tango nakiti na Selembao, ezalaki na mokonzi moko ya basoda azalaki kolekana na bajeep mibale ya basoda liboso moko na sima. Ye moko azalaki na kati ya Jeep moss una kati-kati. Soda moko akomi kobelela na etinda-mongongo : “ longwa na nzela, longwa nzela”.

Kasi nzela yango ezalaki kaka pe ya mabulu-mabulu. Bakumbi taksi-bisi bazalaki kobanga noki te ebebela bango. Basali makasi po na kotika nzela. Kasi taksi-bisi moko, tango alingi asala manevre po abalusa motuka pe alongwa na nzela, pii ! Móto ekati. Mwana mobali oyo amoni ndenge ya kosala te, asi ayebi ete, bakobotela ye mukomprena. Akita, na malembe, atika motuka na fungola ya motuka. Ye wana apakata na kati ya Bumbu! Moteki-tike adusola swabala.

Basoda ya mokonzi bazangi mayele. Kaka eyei lisusu makasi na nzela. Nzela ekangami penza nde ya somo. Basoda bayei na elulu po batindika Hiace oyo basundolelaki bango, bakoki te. Ekati molimo penza.

Bapolisi ya nzela, bazalaki kosenga mbongo epayi mituka ya UPN etelemaka. Bazoyeba te ke na ndelo ya bala-bala Landu, nzela ekangami.

Mokonzi pe mayele akita te. Po ye moko azomona bopeto oyo azalaki na yango, na kati ya Jeep ya malili, akita na fulu oyo ya Selembao ? Afandi kaka na motuka, azopesa mitindo. Basoda na ye bakiti, bakomi kobongisa etamboli ya mituka. Ezwaki bango ata ngonga mobimba liboso bakoka kokoma na ndelo ya bataksi ya UPN.

Wana ngai esi nakitaki na ndelo ya Landu pe nazali kopusana na makolo, po naleka fulu na ngai ya Selembao lokola momeseno. Nasalaka na UPN. Esengelaki nakutana na balakisi misusu na ngonga ya libwa. Wana esi tokomaki ngonga ya mwambe. Napusani malembe-malembe.

Namonaki ndenge mokumbi na moteki-tike basundolaki taksi-bisi pe na ndenge nzela ekangamaki. Tango makanisi ezongeli ngai ete esengelaki nakende kozwa taksi na ngai po nakende UPN, mituka ya mokonzi eyei kokoma esika bapolisi ya nzela bazalaki kokongola misolo.

Komona bapolisi bamonaki mokonzi oyo, lokola na filime, bango nyonso motoba, bapakati, balimwe na Bumbu. Bato nyonso bazalaki wana, bakufi na koseka.

Esali ngai motema pasi pe na kanda, naweli kokota na ketch oyo eyaki po etikalaki moke nabwakela mokonzi yango : “Si bino nde bokotisi mabe nyonso oyo!”.

Nasali makasi nakanga monoko na ngai. Ata bato oyo tokotaki na bango na taksi ekomaki nde lisolo na bango. Kino tokomaki na UPN, nafungolaki monoko na ngai te.

Ezalaka na mikolo ya bongo !

banda kotanga na ebandeli.

Landela kotanga

Une réflexion au sujet de « Bisika bikawuka 2 – Mokolo ya liboso – Na nzela ya mosala »

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *