Bakoko pe Nzambe : boyambi na ngai

 

Bato mingi etungisaka bango tango nakumisaka bakoko.

Ekoki kozala po, na boyambi na bango (Bakristu to Bamizilima), bakoko bazalaka na molongo te. natosi boyambi na bango kasi nalingi nalimbola boyambi oyo ya ngai.

Na boyambi na biso bayindo, uta kala-kala, boyambi elengelama na motindo oyo :

1. Moto
2. Bakoko
3. Bankita
4. Mokeli (nzambe)

Moto akobelela milimo ya bakoko na ye po basunga ye. Bakoko bakoloba na bankita. bankita bakoloba na Nzambe.

Na boye, tango nazali kobelela bakoko na ngai, elakisi te ete, natie bokabwani kati na bakoko pe Nzambe.

Nzambe azali na bokasi ezanga suka, na monene ezanga suka, na mayele ezanaga suka…

Ngai kamwa moto pamba, liboso ya ezanga suka ya motindo oyo, nayebi te nini nakoki koloba na ye, oyo ye ayebi te.

Nakobelela bakoko po, bango nde bazali na esengo soki nakeyi liboso, bango nde bazali na mawa, soki nazongi sima.

ADN oyo ezali na bimoyi (cellules) na ngai, ezali ADN oyo ewuta na nzoto na bango.

Tango nazali kobelela bakoko, nazali kokende koluka nguya oyo ebatama kati ngai po nakende liboso.

Boyambi oyo ekoki komonana ete ekeseni na boyambi ya Bakristu to pe boyambi ya bamizilima.

Yango nde boyambi na ngai. Nalobi te okota na boyambi na ngai. Ngai pe nakokota na boyambi ya moto te.

Makambo ya Nzambe na bana na ye, etalaka kaka moto ye na mokeli na ye. tobomana te.

Totonga Kongo biso nyonso. eloko tozali na yango posa lelo, tolia malamu, tolata malamu, tomisunga na makono, …

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *