Anisa (Fally Ipupa)

Na nzembo oyo « Anisa », moyembi ayembeli mama ya mwana na ye nzembo po na kobelela bolingo oyo azali na yango epayi na ye. Tokotanga liboso nzembo na suka nde nameki kolimbola nzembo yango.

Anisa amour

Oyo tokoloba lelo

Eleka oyo tolobaki lobi

Bonheur

Richesse

Longévité

Amour

Nzambe apesa

 

Nabandeli yango mbala misato

Po yango nde eloko eluti motuya

Nabandeli yango mbala misato

Po yango nde eloko eluti motuya

 

La parole faite chaire

C’est Jésus

L’amour en personne c’est Anisa

Yo Anisa

Yo Ninelle

Mama na Hugues Henri.

 

Bonheur

Richesse

Longévité

Amour

Anisa amour fou

 

Anisa azali mbisi ya aquarium

Mais ngai nakolia ye

Po atonda elengi

Atonda bolingo

Aza spéciale

Anisa soki azalaki na tango ya Pharaon

Mbele Pharaon alingaki kozala polygame te

Po kitoko ya basi na ye nyonso

Etonda na nzoto ya Ninelle.

Anisa

 

Tendresse ya maçon

Na esimbeli ya taloche

Ya ngai tendresse

Esimbeli ya Anisa

Amour ya vrai

Botuna Ninelle

Botuna Anisa

 

Asukolaka ngai

Apangusaka ngai

Alatisaka ngai

Alambelaka ngai

Aleisaka ngai

Alalisaka ngai

Afinikaka ngai

As’occupaka ngai bien

Atamizelaka ngai

Mwinda ya abat-jour

 

Tendresse ya maçon

Na esimbeli ya taloche

Ya ngai tendresse,

Esimbeli ya Anisa

Amour ya vrai

Botuna Ninelle

Botuna Anisa

 

Asukolaka ngai

Apangusaka ngai

Alatisaka ngai

Alambelaka na ngai

Aleisaka ngai

Alalisaka ngai

Afinikaka ngai

As’occupaka ngai bien

Atamizelaka ngai

Mwinda ya abat-jour

 

Nzambe na ngai

Merci papa

Papa Otshombe

Merci papa

Obota Ninelle

Mama ya mwana na ngai

Obota Anisa

Amour ya vie na ngai.

Nasi nalangwa na ngai

Bolingo ya Anisa na ngai

Nalapa ndayi

Ngai nasuki awa

 

Nasi naleka na ngai

Bolingo ya moitié moitié

Nalapa ndayi

Ngai nasuki awa

Nazapa na ngai

Balove ya demi-mesure

Yango nabengaka yo

Bébé chérie mama na Hugues Henri

Napesa yo kitoko na ngai

Ya kati pe ya libanda

Exclusivité

Bongo ozwa na yo ngai

Exclusivité

Sala na ngai oyo olingi

Exclusivité

 

Mama na Hugues Henri

Chérie na ngai

Nasi naleka na ngai

Bolingo ya moitié moitié

Nalapa ndayi

Ngai nasuki awa

Nazapa na ngai

Balove ya demi-mesure

Yango nabengaka yo

Bébé chérie mama na Hugues Henri

Napesa yo kitoko na ngai

Ya kati pe ya libanda

Exclusivité

Bongo ozwa na yo ngai

Exclusivité

Sala na ngai oyo olingi

Exclusivité

 

Naboyi balongola matiti pene ya lilita na ngai

Bankusu bazolia nzoto bazokipe te

Kasi Bula ebongi oyeba

Mama na Hugues Henri

Azali songe oyo nalotaka

Ata na insomnie

 

Anisa

Okomisa ngai

Lokola mwana moke

Alelaka biscuit bonbon chocolat

Amour na ngai ekomi elengi

Po naboyi bayiba sentiment ya bolingo oyo

Nabenga chérie

 

Nasi naleka na ngai

Bolingo ya moitié moitié

Nalapa ndayi

Ngai nasuki awa

Nazapa na ngai

Bolingo ya demi-mesure

Yango nabengaka yo

Bébé chérie mama na Hugues Henri

Napesa yo kitoko na ngai

Ya kati pe ya libanda

Exclusivité

Anisa ozwa na yo ngai

Exclusivité

 

Chérie na ngai Anisa

Mama ya mwana na ngai

Hugues Henri

 

Bososoli
Nkotela :

 

Moyembi abandi na kosakola ete : « Oyo tokoloba lelo, Eleka oyo tolobaki lobi ». Lisakola oyo ezali komonisa boni boni moyembi azali kobelema po na koloba oyo eluti motuya na bomoyi na ye pe azali kozela ete, na bamvula ya sima, bolingo na ye ekoba se kokola. Yango wana, liboso ya kobanda kobelela, asakoli ete : « Oyo tokoloba lelo, Eleka oyo tolobaki lobi ».

Ezala po na lelo, ezala po na lobi, asaleli ngonga ekoya. Ezali po, ata lelo, nanu alobi te, oyo esengeli aloba. Alobi nini?

Moyembi abandi koyemba na bolobaka : « Nabandeli yango mbala misato, po yango nde eloko eluti motuya». Po na moyembi, « Bonheur, Richesse, Longévité, Amour », mamanyoli oyo minei nde eloko eluti motuya. Na Lingala, tokoloba ete, po na moyembi, « esengo, bomengo, bowumeli pe bolingo » yango nde makambo « Nzambe apesa »  pe oyo eleki motuya.

Na sima ya kosakola mamanyoli oyo eleki motuya, alanga-nzembo atalisani bato mibale : Yesu masiya pe Anisa Ninelle. Epayi, liloba ya Nzambe ezwi nzoto ya moto. Alanga-nzembo abengi ye : Yesu Masiya. Epayi mosusu, bolingo ezwi nzoto ya moto. Abengi ye : Anisa. “La parole faite chaire, c’est Jésus. L’amour en personne, c’est Anisa ». Awa nde alanga-nzembo ayebisi biso kombo pe mokumba ya Anisa : « Yo Anisa, Yo Ninelle, Mama na Hugues Henri ».

Na moboko oyo elandi, ekomi nde tango ya kobelela pe kokumisa. Alanga-nzembo atalisani Bolingo na ye na mbisi ya mayi-ebatelo (Aquarium). Mbisi oyo atiamaka na ndako basalela ye. Ezalaka po batalaka ye lokola lombe (fleur), eloko ya kokitisa motema. Kasi alanga-nzembo azwi ye lokola bilei oyo ekosilisa nzala na ye. Mbisi ya mayi-ebatelo azalaka moke penza, okolia ye, okotonda pe te. Kasi Anisa azali na ebatelo pe akoki po na kosilisa nzala ya alanga-nzembo. “Anisa azali mbisi ya aquarium mais ngai nakolia ye po atonda elengi ; atonda bolingo ; aza spéciale”. Wana maloba ya Fally Ipupa.

Moyembi atalisani lisusu Anisa na lisanga ya basi ya Faraon. Anisa soki azalaki na tango ya Faraon mbele Faraon alingaki kozala na basi ebele te po kitoko Ninelle elingaki kotondisa motema ya Faraon. Kitoko ya basi na ye nyonso etonda na nzoto ya Ninelle. Wana tozali komona boni-boni alanga-nzembo alula Anisa. Amonaka ye kitoko makasi. Elingi koloba ete, ye moko azali na basi mosusu te po kitoko tonda na nzoto ya Anisa.

Mwa mosika, alanga-nzembo atalisani bonkonde ya Anisa pe oyo ya motongi ndako na mbeli na ye ya mosala. Botawu (tendresse) oyo Anisa alengelaka ye ekokani na botawu oyo motongi ndako alengelaka mbeli na ye ya mosala. Yango wana Fally alobi : “Tendresse ya maçon na esimbeli ya taloche, ya ngai tendresse esimbeli ya Anisa

Alobi ete oyo azali na posa ya koyeba bolingo ya solo ezali nini, atuna Anisa Ninelle. Na sima atangi misala nyonso ya motuya oyo Anisa asalelaka ye : “ Asukolaka ngai, apangusaka ngai, alatisaka ngai, alambelaka ngai, aleisaka ngai, alalisaka ngai, afinikaka ngai, As’occupaka ngai bien, atamizelaka ngai mwinda ya abat-jour”. Tamiser ezali likelelo na français po na koloba ayungolelaka ye kongenga ya mwinda ya pokwa. S’occuper ezali kokipe.

Awa ko asakoli bolingo, kitoko pe misala ya Ninelle. Fally Ipupa azongisi matondo epayi ya Nzambe pe na Otshombe, tata na Anisa. Awa tomoni ete moyembi asangisi likanisi ya Nzambe-Mokeli pe Tata-Moboti. Ndenge tolobaka ete, baboti bazali banzambe ya se. Mingi-mingi, bato bakumisaka mama oyo abota mwasi. Ezali mbala mingi te, toyoka alanga-nzembo akumisa tata. “Nzambe na ngai, Merci papa. Papa Otshombe, Merci papa, obota Ninelle, mama ya mwana na ngai, obota Anisa, Amour ya vie na ngai”.

Po na komonisa boni boni, oyo azali koloba lelo, alingi etikala oyo akozalaka kolobaka po na libela, alanga-nzembo alapi ndayi epayi ya tata oyo abota Anisa : “Nasi nalangwa na ngai bolingo ya Anisa na ngai. Nalapa ndayi, ngai nasuki awa”.

Alanga-nzembo abaloli miso epayi ya bolingo na ye pe asakoleli Ninelle maloba oyo : “Nasi naleka na ngai bolingo ya moitié moitié (bolingo ya ndambo-ndambo). Nalapa ndayi, ngai nasuki awa. Nazapa (nalongola miso) na ngai balove ya demi-mesure (bolingo ya dongi). Yango nabengaka yo, Bébé chérie mama na Hugues Henri”. Na kosakola oyo, alanga-nzembo akotisi kombo ya mwana na bango, likonzi ya bolingo : Hugues Henri.

Alanga-nzembo afungoleli Anisa motema po ayeba nini ezali kuna : “Napesa yo kitoko na ngai ya kati pe ya libanda exclusivité (kaka po na yo moko). Bongo ozwa na yo ngai exclusivité, sala na ngai oyo olingi , Exclusivité”. Kitoko ya libanda ezali elongi, nzoto… ebongo Kitoko ya kati ezali nini ? Nyonso oyo ya malonga mobali akoki kolakisa na mwasi na ye pe kobelema po na kosalela mwasi na ye.

Abaloli miso epayi ya mokili po basambisi ya nzela bayoka, alanga-nzembo asakoli ete : “Naboyi balongola matiti pene ya lilita na ngai. Bankusu bazolia nzoto, bazokipe te. Kasi ebongi boyeba : Mama na Hugues Henri aAzali songe (ndoto) oyo nalotaka ata na insomnie (pongi ekimi).

Na suka na yango, alanga nzembo amoni boni boni akeyi mosika po na kosakola bolingo oyo. Amitalisani na mwana moke oyo azali kolela bonbon pe shokola. “Anisa, okomisa ngai lokola mwana moke alelaka biscuit bonbon chocolat. Amour (bolingo) na ngai ekomi elengi po naboyi bayiba sentiment ya bolingo oyo, nabenga chérie”. Suka oyo emonisi boni-boni bolingo ezalaka moselu, efandaka penza na mabanga ya siki-siki te. Ayebi ete, lokola mwana moke, baninga pe bakoki koya kobotola. Yango alanga-nzembo alobi eta aboyi bayiba bolingo oyo abenga : chérie.

Ndoba (vocabulaire)

Na loyembo oyo, moyembi asaleli maloba ya mokolo na mokolo kasi alambi yango na ndenge ya malonga. Kasi tomoni pe ete, alanga-nzembo akotisi maloba ya français mingi. Asali lokola oyo babengaka lingala facile, ata ko ezalaka pete kaka na kombo. Maloba lokola bonheur, longévité, exclusivité, taloche, tamiser, abat-jour, demi-mesure, moitié ezali maloba oyo esengaka kolimbola yango po bato basimba tina malamu-malamu.

Makelelo (verbes)

Alanga-nzembo asaleli mitalaka ya libonginyi (tiroirs de conjugaison) na ndenge esengeli. likambo na likambo elobami na ngonga oyo esengeli kolobama.

Asaleli ngonga ekoya (futur) po na kolaka : “oyo tokoloba lelo…”

Po na kosakola bosolo efanda, asaleli ngonga ya ezalisi (présent) : “nabandeli, azali,

Po na kotalanisa na basi ya faraon asaleli soki mbele (conditionnel) : soki azalaki… alingaki

Asaleli mingi ngonga ya momeseno (habitude): asukolaka, alatisaka, aleisaka…

Asaleli makola ezanga likelelo : “Tendresse ya maçon na esimbeli ya taloche, ya ngai tendresse esimbeli ya Anisa”.

Po na komonisa ete oyo akanaki ezali se bongo pe ekotikala se bongo, asaleli eleka pwasa (passé figé) : nalapa, nazapa, obota, napesa.

Po na mposa asali etinda (potentiel) : ozwa, sala

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *